التيليسكوب

صديق بيقولي: شوفت واحد سايق عربية نص نقل و طلع ع الرصيف و لف من الطريق التاني علشان الطريق الأول زحمة.. وقلت المصري هيفضل مصري

صديق آخر: الإقتصاد بينهار بسبب الناس المضربة عن العمل .. الشعب المصري شعب فرعون و الناس أخدت على الأنتخة!

صديق آخر: كنت بقول الثورة حلوة.. بس دلوقتي حاسس اننا بنضيع!

صديق آخر: خبر بيقول ان مبارك في غيبوبة متكررة و الراجل بيرفض ياخد الدوا.. احنا بهدلنا الراجل.. تصدق حرام اللي بنعمله ده

صديق آخر: تعطيل الدستور ده قالقني و اللعب هيبقى كبير و ربنا يستر!

الخ..

ردي على كل الكلام ده:

1- الشعب المصري اتعود على عدم النظام و الالتزام به سنين طويلة.. اتعود على مرتبات قليلة فلما تتمد ايده لقبول رشوة مرة ف التانية بقت عادة.. مش شايف انه بياخد حاجة م البلد او بتقدره كبني آدم و بالتالي كنا بنشوف شخص يكسر اشارة عادي خالص يرمي ورقة او منديل في الشارع و هو ماشي.. و بمرور الوقت بقت اتحولت العادة لثقافة شعب!

الكلام ده كله مش هيتغير ما بين يوم و ليلة.. اللي راح التحرير مش زي اللي مراحش.. اللي راح شاف مصريين افتقدناهم من سنين طويلة

و دورنا دلوقتي انك تمنع الغلط .. ما تشوفش حاجة غلط و تقف ساكت.. اتحرك و اعمل خطوة

واحدة واحدة .. المصريين كلهم هيرجعوا لطبعهم الأصلي.. من كرامة و كرم و شهامة و أصول..

2- الناس كانت بتاخد مرتبات قليلة جداً.. ازاي يكون مستوى الطبقة المتوسطة اللي عايشة بالتيلة أدناهم بياخد مرتب من 1500- ل 2000 جنيه.. و معظم الناس..الشريحة الأكبر للمصريين مرتبهم أقل من كده بكتير!!

الناس اللي بتعمل اضراب في المصانع و الشركات .. حقها.. الناس هتشحت كمان شوية و محدش يحس بيهم الا واحد قعد في وسطهم و شاف هم عايشين ازاي..

وقوف المصانع و الشركات بيضر البلد و الاقتصاد..؟!

طيب تعالى نفكر بالعقل

(اقرأ المزيد …)

قرائي الأعزاء.. يمكنكم تحميل صور ثورة مصر 2011 الآن – أكثر من 300 صورة بجودة عالية -  في ملف واحد هدية من أبو جاد الله فوتوجرافي من هنــــا

تحياتي..

م. محمد أبو جاد الله

بانوراما التحرير.. بزاوية 300 درجة تقريباً.. من مبنى مجمع التحرير في أقصى اليمين.. حتى مقر الحزب الوطني – سابقاً – في أقصى اليسار!

جودة عالية برابط مباشر من هنـا (كليك يمين و فتح في نافذة أو تاب جديد)

م. محمد أبو جاد الله

سلام الله عليكم و رحمته و بركاته..
عارفين..
أخدت معايا كاميرتي.. و نويت اني اصور كل لمحة.. كل ضحكة.. كل دمعة.. كل حاجة..
كنت حاسس وانا بصور اني بعمل حاجة مهمة قوي.. رغم كل المتاعب اللي قابلتني
كنت حاسس اني بشارك في كتابة تاريخ مصر.. بالصور
ضحكت.. دمعت.. بكيت من قلبي.. صرخت لما صوتي راح.. انفعلت لغاية ما ثار جهازي العصبي ضدي و فقدت الوعي.. وجدت الكثيرين محافظين عليا و بياخدوني للعيادة الميدانية..
دعيت من قلبي و قلت.. يااااااااارب
و برحمته اللي وسعت كل شئ.. استجاب.. و سقطت امبراطورية طغيان دامت تلاتيييين سنة!!
مقدرش أوصف مشاعري لأني عارف اني هفشل.. كلام ايه اللي هيقدر يقف صامد و يوصف مشاعري اللي ممكن تهد جبال دلوقتي…
الحمد لله.. ربنا أكرمني زي ما تمنيت و  كنت نقطة حبر تكتب كلمة في تاريخ مصر الحديث.. بالصور..
من صفحتي…
ده الجزء الأول و ده الجزء الثاني
قريباً إن شاء الله – عشان هياخد وقت – هرفع كل الصور – أكتر من 300 صورة إحترافية  و بجودة عالية – في ملف مضغوط هدية مني لكل واحد بيحب مصر…
سلام…
محمد أبو جاد الله