في يوم زمان, كنت ماشي مع صديق ليا, و زميل إسمه سامح – الله يمسيه بالخير – في وسط البلد.. كنا بندوّر على شغل..
كان يوم طويل جداً.. مُتعب جداً.. لكن ضحكنا جداً !!
و دي ميزة الشعب المصري…!
يضحك في فرحه..
يضحك في حزنه..
يضحك في كل وقت!!
الضحك وقت الفرحة مفهوم, لكن ضحكه وقت الحزن فـ.. برضه مفهوم!.. صحصح معايا كده أمال !!
أقولك مفهوم إزاي..!
علماء النفس بيقولوا إن النفس البشرية دي لها حاجات بتدافع بها عن نفسها!, و اسمها الحيل الدفاعية..
أبسطها أكتر يا سيدي.. يعني النفس البشرية نقدر نشبهها بقلعة حصينة..
لكن خبراء الأمن بيقولوا إن مفيش قلعة مالهاش ثغرات أمنيّة؛ و بالتالي النفس البشرية لها حاجات كده اسمها الحيل الدفاعية, و دي لازمة لسدّ الثغرات الأمنيّة الأمنيّة إياها!
و الحيل دي منها.. الأكل.. النوم.. و الضحك!!
همّ عموماً 16 حيلة.. بس تصنيفهم مش مجالنا!
و الحاجات دي النفس بتلجأ لها لما يكون فيه مصيبة.. ضغط عصبي.. إلخ.
و لذلك الشعب المصري.. طلع من زمان قوي و هو عارف علم نفس!!
شفت الحلاوة!!
كنت بتكلم ساعتها مع سامح عن مشكلة الشباب في البلد..
تعليم.. توظيف.. سكن.. زواج..إلخ إلخ!!
لقيته ضحك قوي, و قالي يا عمّ ماحدش واخد منها حاجة!!
هو طبعاً يقصد إن الدنيا ماحدش هياخد منها حاجة لما يموت.. فمتزعلش قوي كده..
إلا إن ردي كان ضحكة من القلب, أدهشته.. و قلت له :
"فعلاً بلدنا حلوة.. ماحدش واخد منها حاجة!!"
محمد أبو جاد الله..
| 
ايه يابوجادالله مش عارفنى؟!!
انا سمعت من صديق رجل أعمال مصري ان كان بيتكلم مع رجال أعمال لبنانيين بيستثمروا فلوسهم في أنجولا! قالهم طب ليه ما بتجوش مصر؟
قالولوا: انت بتهرج .. مصر دي زي التورته المتقسمه لو قربت منها متبقاش تزعل من سكينة التورته
ايه يابوجادالله مش عارفنى؟!!
معلش انا هتكلم شوية عن السفر للخارج بس له علاقة بالموضوع
انت عارف احنا في مصر بنتعلم تقريبا ببلاش … لما بنسافر بره بنلاقي الناس عايشه حياة راقية آه بس من غير تعليم عالي عشان التعليم مكلف جدا … نيجي احنا بقى متعلمين تعليم عالي ومع شوية اجتهاد يبقى وضعنا في بلدهم احسن من وضعهم!
يعني عشان تاخد من مصر حاجة لازم تخرج بره مصر!
المشكلة دلوقتي ان معنى كده ان أي واحد عنده قدرات كويسة يا إما هيتخنق في مصر يا إما بلد تانية هي اللى هتستفيد منه!
لكن للأسف أكتر ان بعض الناس بتسيب مصر وهيا شغالة في وظائف راقية وهامة عشان يشتغلوا بره عمال أو سواقين تاكسي .. أعرف واحد قريبي كان شغال باحث في المعد القومي للبحوث وبيحضر ماجستير وكده .. طبعا مش عارف يتجوز لأن مرتبه أقل شوية من مصاريف المواصلات .. راح فين؟؟ .. السعودية .. اشتغل ايه؟؟ … عامل بناء! بيقبض مرتب هزيل نسبيا بالنسبة للسعودية ولكنه 10 أضعاف مرتبه في مصر!
محمد أبو جاد الله
كلامك منطقي جداً.. و ده اللي بيحصل
الشغل في مصر بيمص دم الشاب بس مش بيقدره مادياً و ساعات كتير معنوياً
و الشغل بره برضه بيمص دمه لكن بيقدره على الأقل مادياً!
و كأن دي خطة لتطفيش الشباب, هتقولي العملية عندنا في مصر على قد الحال
أقول بالعكس فيه استثمارات اجنبية و خليجية عندنا جبارة بس المرتبات مش زي لو كنت شغال في دولة تانية غير مصر..
فعلاً فعلاً .. يا خسارة
و تسلم ع المرور الغالي يا غالي.. أكيد عرفتك من الإيميل يعني :D
حيث انك عارفني بأه بتسأل ليه؟
انت عارف ان في شركة سعودية اسمها (حرف) كانت عايزة توظف خريجي لغة عربية وهندسة وحاسب آلي عشان هيا نشاطها تحويل كتب التراث إلى نسخ إلكترونية .. مطولش عليك .. واحد ابن حلال قالهم يا جماعة بدل ما تجيبوا الناس دول هنا وتدفعولهم تذاكر طيران ومرتب على الأقل 5000 ريال ، خلوهم في مصر زي ما هما يشتغلوا على الكمبيوتر ويبعتولنا شغلهم على النت ونشبرق كل واحد فيهم ب 700 – 800 ريال كدهفي الشهر وهما هيبوسوا ايديهم وش وضهر .. تخيل فعلا ان صاحبنا اللي كان شغال في الشركة دي وبيقبض ألف جنية كان هايص وراح اتجوز وأجر شقة جنب الشغل ب 150 جنيه وساعد اخواته فى جوازهم والأشية بقت معدن… عمار يا مصر!
محمد أبو جاد الله
الحكاية تتعب اي حد نفسياً..
منهم لله اللي كانوا السبب.. اللي خلوا كل حاجه في البلد تغلى.. إلا البني آدم بيرخص!!
تسلملي على مرورك الجميل و يارب دايماً :)
soma
كلامك ده فكرني بيوم كان مطلوب مننا حجات كتيييييرة جدا فالكلية بمعني أصح لو اشتغلت بإيديا وسناني عشان أخلص مكنتش هخلص
فجأه كده جاتلي هيسترية ضحك * ضحك .. يعنى قولت بدل ضايعه ضايعه يبقي ملوش لزمه الزعل والضيق لأن دى الحاجه الوحيده ايلي الدكتور مش هيحاسبني عليها
الحياة دى مححتاجه فعلا ناس نفسها طوووييل وإيمانها جامد وعندها حيل تتغلب بيها عاليأس والزعل
وشكرا عالموضوع الجميل
محمد أبو جاد الله
شكراً على مرورك الأجمل :)
ghost
رغم ان فيه احصائيات وبتاع بتقول ان معدل المنتحرين – ما شاء الله يعنى – فى ازدياد مستمر ، لكن تلاقى كل البرامج بتقولك المصرى ابن نكته وبيعرف يعيش حياته صح من غير اكتئاب ،طب ازاى يعنى ؟! على اى حال الحمد لله ان فيه ناس بتقدر تضحك فعلا وتحاول تحل مشاكلها من غير ما ترمى نفسها تحت المترو او النيل ، عشان النيل مش ناقص يعنى
شكرا على الموضوع الجميل فعلا
محمد أبو جاد الله
المنتحر بيكفر مرتين.. مرة لما بينهي حياته و اللي قبلها انه كفر برحمة ربنا بيه!
وبالنسبة للضحك ف دي حيلة دفاعية زي ما كتبت ف المقال علشان الناس ما تطقش و ربنا يسترها :)
شكراً على مرورك الأجمل