- تسمع عن السومو؟!
- كنت اسمع اختي الصغيرة, لما كانت تقول "انتوا هتـ سومو بكره؟!"
- هئ هئ هئ.. لا يا جاد أفندي.. السومو ده رياضة كده عجيبة!
- إزاي بقى؟!
- أصل اللي بيلعبها غالباً التخان بس.. و مش أي تخان.. اتنين كده يقفوا على طرفي ممر.. و يجروا بسرعة أول ما يسمعوا صوت الضربة على غطى الحلة الأصفر إياه.. و يخبطوا في بعض.. اللي يوقع التاني يبقى غلب.. ده حسب معرفتي المش ولابد يعني!
- يا ساتر.. دول بيفكروني بموضوع اسمه التصادم المرن و التصادم الغير مرن أيام التوجيهي!
- أهه ده بقى يا جاد أفندي تصادم مرن جداً (ملعبّاً حاجبه الأيسر في عزف منفرد)!
- طيب ما قولتليش مالها السومو؟!!
- مفيش.. أصل تخيلت لاعب سومو من دول.. كان في طيارة خاصة مثلاً و وقعت بيه.. و هو اللي عاش و كل اللي معاه ماتوا!
- كان المفروض يمدد على أرضية الطيارة علشان يوزنها!
- هئ هئ.. لا يا جاد أفندي.. حادثة مثلاً حصلت.. و جه حظه الأغبر في بلد الناس اللي فيها بتاكل لحوم البشر!!
- لااااعب سومو.. في بلد بياكلوا لحووووم البشر؟!!!!!
- آه!
- يا نهار مش فايت.. دي تبقى طبلت!
- بالظاااابْط..!!.. تخيل كده مخزون إستراتيجي لكام يوم .. قول لكام شهر كده قدام!!
- طب إيه اللي جاب التخيل الهلامي ده على ذهنك – عدم اللامؤاخذة يعني – ؟!
- أقولك يا سيدي.. (فارداً أمامه صحيفة اليوم).. بعد الأخبار اللي قريتها من شوية.. حاسس إن ده حال العرب مع بعض الدول الأجنبية في أيامنا الحالية…!!
| 
حيث انك عارفني بأه بتسأل ليه؟
والله فعلا احنا عاملين زي لاعب السومو اللى وقع في ايدين ناس معاها سكاكين و مسدسات … نفعه بإيه جسمه بأه (غثاء كغثاء السيل)
بمناسبة لعبة السومو : الحكم مش بيضرب طبق اصفر ، ده هو بيقرفص قرفصة عجيبة كده وهو ماسك مروحة أو مراية بتعكس الضوء ويفضل يذل اللعيبة شوية وهم حاطين ايديهم على الأرض وعند لحظة معينة بيهجموا .. يمكن لما بتلمع المراية أو يمكن لما بيشوفو فيها شكلهم .. الله أعلم
وطبعا مجرد ان يزؤه بره الدايرة أو يوقعه يكسب على طول .. ولا ضرب ولا تخبيط وألذ حاجة لما يعكمه القرشين أول ما يكسب علطول من غير فرح ولا مولد
المهم بأه ان لو واحد وقع منه الماواشي اللي لابسه ده (الأندروير يعني) بيخسر! عشان كه بيبقي متمسك بيه .. (هو الشرف لعبة ياعم الحاج)
محمد أبو جاد الله
بل بالعكس الربربه كانت ضده كمان !
و شكراً جداً ع المعلومات القيمة عن اللعبة, إيه الحلاوة دي؟
و بالنسبة للماواشي.. فأنا كنت فاكر ان دي تسمية قطيع من الماشية عندنا.. لكن طلعت عندهم أندروير.. ياللعجب!
و زي ما هم بيتبّتوا ع الماواشي عندهم , فلاحينّا بيتبتّوا ع الماواشي بتاعتهم برضه.. و مفيش حد أحسن من حد يا عم الحج
عبد الله
طيب السومو أي نعم مخزون استراتيجي .. بس أعتقد إن لحمه مر جدا ! ومش هيتاكل بالساهل ! يعني السومو أحسن مننا !
محمد أبو جاد الله
عبد الله
على حسب ما سمعت – ماحصليش الشرف يعني!:D – ان لحم البني آدمين حادق بزيادة عن اللحمة العادية
لكن بالنسبة للاعب السومو فممكن لو الناس دي عندها وصفة الحواوشي.. هتهيص بجد ^_^
تسلم لمرورك الجميل :)
ghost
اممم .. لا لا احنا عدينا حكاية السومو دى خلاص ، مبقاش فيه خناقة بينا وبينهم اساسا ، هو بس عمو اوباما ينوى يضرب العراق بعد صلاة العشا وكل حاجة تخلص فى لحظة ، شكرا على المعلومات المفيدة عن السومو :)
محمد أبو جاد الله
للأسف.. صرنا بالفعل أشبه بالنعاج التي تنتظر الذبح.. لا حول ولا قوة الا بالله!
شكراً لمرورك الجميل :)